Mir werdn uns schon drån gwöhna
Mi zwickt mei rechter Fuaß.
Da Årzt sågt, s is da Ischias,
ma kånn fast nix dagegn tuan,
spazierngehn, hatschn, grantig murrn.
I muaß mi hålt drån gwöhna.
Mei Lindn saglns um.
In Park is's gståndn hundert Jahr.
Ihr Schåttn fehlt mar in da Hitz.
I huck jetzt in da Sunn und schwitz
und muaß mi ah drån gwöhna.
Es Öl in Meer wird mehr?
Die Fisch und Krebsn gengan ein?
A Vogl, gånz mit Öl verschmiert,
hålt des net aus? Des Viech krepiert
und kånn si net drån gwöhna?
Scho wieder gibts an Kriag.
In Fernsehn zagn's as gånz genau,
wia d Bombm auf die Kinder fålln
und Brautleut mitn Lebm zåhln.
Da soll ma si drån gwöhna?
Mei Schädl brummt heut ah.
Derweil hat mir da Wein so gschmeckt,
"i schenk mar no a Glasl ein,
es muaß jå net dås Letzte sein,
hollodaro"
- då kunnt i mi drån gwöhna -
Geschrieben zum
Kuwait-Krieg
und leider noch immer aktuell.
