Mei Fuaß tuat mar weh!
Mei Fuaß is verknöchlt,
es kennt's den Schmerz sicher jå eh.
Zum Åushåltn war's,
mei rechter Fuaß tuat mar hålt weh.
An Årzt håb i g'frågt,
der sågt mar so gånz ohne Schmäh:
"Ma kånn net viel måchn,
der Fuaß tuat a Zeitl hålt weh."
A Chirurg håt mi gschnittn
und zuagnaht scho ah, des wisst's eh.
Da Endeffekt wår:
De Kraxn tuat ållweil no weh.
Jetzt nimm i a Håckn,
bevur i vur Schmerzn vergeh
und håck mar 'n Fuaß å. -
Erst recht tuat des Grippelgspiel weh.
In Fuaß schmeiß i weg
in an riesign Haufn voll Schnee.
Da Schnee, der zergeht
und mei Fuaß tuat no ållerweil weh.
Jetzt rennt der Fuaß weg,
rennt glei quer über Wiesn und Klee,
is båld nimmer zan Sehgn -
und tuat mar no ållerweil weh.
In Fuaß håb i gfundn
hoch drobm åm Berg, in da Höh;
Er håt mi groß ångschaut.
Des Klumpert tuat mehr und mehr weh.
I håb mit eam gredt
bei an Kipferl, an Häferl Kaffee
und håb eam stad gfrågt:
"Warum tuast mar du går a so weh?"
Der Fuaß håt nur gmant:
"Ins Spitål, zum Chirurgn muaßt geh.
Wenn der mi durt ånnaht,
dånn tuar i dar nimmermehr weh."
Des håbm mar glei gmåcht.
Mei rechter Fuaß is wieder schön.
Heut stiert mi nur ans:
Jetzt tuat mar da linke Fuaß weh.
